Zindagi ka safar

baadal,
dariya,
rait sa jeevan
kab kiske haath aaya hai.
ek ek kar saari yaado ko
dil mein hi dafnaaya hai.

khidki se chhanti
dhoop ke tukdon
mein jeevan tha,
woh bachpan tha
wahin kahin imli ki jad mein,
thoda khod chhipaaya hai.

patton se risti baarish mein
jo dil mein halchal machti thi
kya woh teri hasti thi
haan, tum khul ke hansti thi,
us bheegi hui hansi ko apni
aankho se barsaaya hai.

woh sadak kinaare
chaay sahaare,
shamein kaatin yaaron ke sang,
din guzaare,
har us din ki
dhundhli yaadein
dhundhle dhuein mein udaaya hai....
......
zindagi ka safar...........
-'Khayaal'