ankahi..(hindi)

char qadam chala
thithak kar rukna pada..
vishdhar ki jeebh sa
woh do-faad raasta
muh baaye khada tha
ya muh chidha raha tha
maalum nahi.....
kuch shabd se kaano me pade,
sahi galat, galat sahi
kuch pehchaane kuch ajnabi
ek dheemi dheemi pukaar
ek cheetkaar
antarman tha ya paristhiti
kuch samajh na aaya
vikat samay tha...
daayi or chaloon to
baayi aankh bura to na maanegi
aankhein to apni hoti hain...
aawaazein bhi apni thi..
bahut vichaara, phir
ek sarkande ki talwar bana kar
dono raasto kr beech ki vishamtaaon ko
saaf karne laga
soch tha dono ko mila dene se
samasya hal ho jaayegi
kuch prayatn safal hua hi tha
man khushi se uchhal raha tha...
achaanak
raaste vishamtaaon mein
aur vishamta raasto me
gadd madd ho gaye
gardan kisi shikanje me phasi
prateet huyi,
dam ghuta...
aur main
amaratva ko praapt hua....

-'Khayaal'