Munaasibat...

Main kyon aakhir wahi sab mas-ale har baar likhoon,
Sej sholon ko likhoon aur gulon ko khaar likhoon.

Kaisi chubhte hain nashtar yeh mere seene mein
Kaise neze huye dilon ke aar-paar likhoon.

Tumhaari jeet meri jeet hai, tum kehte they,
Tumhaari jeet ko phir kaise apni haar likhoon.

Jawaab mein hi kyonkar rahoon uljha itna,
Sawaal baaqi hain jo reh gaye do chaar likhoon.

Jawaab they tumhaare paas mere shikwon ke,
Magar jawaab ko haami ya ke inqaar likhoon.

Tumhaare pehlu mein madhosh tha main sadiyon taq,
Hai munaasib ke ab khud ko main bedaar likhoon...

-'Khayaal'