Raat gehraane lagi thi, halki si dhundh bhi thee. Angithi me se budhiya ne do koyle ke tukde nikaal kar hukke me rakkhe aur gudgudaane lagi.
Paas hi ek tooti taang wali chaarpaayi pe leta boodha khakhaar ke thookta hua budhiya ko gandi gandi gaaliyaan sunaane laga.
Boodhe ko pichhle saal jaate phaagun se TB ne pakad liya tha, ab wo tha aur uski chaarpaayi... Kabhi haajat par uth jaata tha, kabhi gaflat me chaarpaayi kharaab karta tha to budhiya use gaali sunana shuru kar deti thi...
'sun budhiya', woh dheeme se bola, 'abki jo Raajesar aaye to usse keh ke yeh paya theek kara dena, sirhaane se toota hai, jab kabhi jhoolne lagta hai to kaleja muh ko aa jata hai.'
'Haan haan karwa doongi', budhiya ki zabaan bolte bolte halki si baayi taraf jhuk jaati thi, hakeem saahab ne faalis ka asar bataya tha aur Raajeshwar ko chitthi bhi likh di thi... Koyi teen saal huye.
Beechkhuch haqeem saab aate rehte the budhiya buddhe ka haal lene. Raajeshwar ke wazeefe ke liye inhi haqeem saab ne jugaad lagwaya tha, kehte phirte the bada zaheen ladka hai, apne maan baap aur poore gaon ka naam roshan karega... Ab khet bik chuka tha aur Raajeshwar ke liye gaon me kuch bhi baaki na bacha tha...
Waapas aata bhi to kis ke liye, un gaon walo ke liye jinse baat karne me use sharm aati thi ya un maan baap ke liye jinko maraa hua bata chuka tha aur apni shaadi tak me na bulaya... Boodhe ko sadma laga tha aur aksar behki behki baatein karta tha.
'is baar raajesar se keh kar apne liye angrezi waza ki chilam mangwaaunga aur tumhe dikha ke piyunga yun...', boodhe ko phir se khaansi ka daura pada aur budhiya use gaaliyaan sunaane lagi....
No comments:
Post a Comment